నువ్వే ఆ ఒక్కడివి!

బహు దుర్లభమైనది మానవ జన్మ
బహుమతిగా ఇచ్చాడు భగవంతుడు ప్రేమతో

భౌతిక సుఖ సంపదలు పశ్చాత్య పోకడలు
పర భషా వ్యామోహాలు ధన కనక వస్తు వాహనాలు
వ్యర్ధ గర్వాలు ఆధిక్యతా భావనలు అహంకార ప్రదర్శనలు
కామినీ కాంచన కీర్తి ప్రతిష్టలు దేహ భావనలు

మనిషి మారే దశలో మహమ్మారిలా పీడిస్తాయి
భౌతిక ప్రపంచమే సత్యమని భ్రమలు కల్పిస్తాయి

లక్షలాది మంది భక్తులు నన్ను పూజించి
ఆరాధించినా అందులో ఎవరో ఒక్కడు
మాత్రమే నన్ను పూర్తిగా తెలుసుకుంటాడని
అంటాడు భగవద్గీతలో శ్రీకృష్ణ పరమాత్మ

సాధించాలనే తపన ఉంటే ఏవీ అడ్డు రావు
సాధన చేస్తే సాధ్యం కానిదంటూ ఏదీ లేదు

ఈ జన్మలోనే ఆత్మజ్ఞానం సముపార్జించాలి
లక్షలాది మంది భక్తుల్లో ఆ ఒక్కడివి నువ్వే కావాలి!

కర్మలు కరిగించుకొని వాసనలు తొలగించుకొని
భక్తిని రగిలించుకొని జ్ఞాన దిశగా పయనిస్తుంటే
మమకారాలు మనో వికారాలు మాయా వినోదాలు
రాగ ద్వేషాలు అరిషడ్వర్గాలు అడ్డుగా నిలుస్తాయి

ఇప్పటికే లక్షల జన్మలు నీకు తెలేకుండానే గడిచాయి
బహుజన్మాంతర పుణ్యపాక వశాన మానవజన్మ పొందావు
అలక్ష్యం చేస్తే ఏదో ఒక రోజున గతాన్ని తలుచుకొని
వెక్కి వెక్కి ఏడుస్తావు పశ్చాత్తాపం చెందుతావు !

ఆకాశంలో ధృవతారగా వెలగాలని లేదా !
మహాత్ముల జాబితాలో నీకు చేరాలని లేదా !
సువర్ణాక్షరాలతో చరిత్ర పుటల్లో లిఖించబడాలని లేదా !
పరమాత్మ ఒడిలో భద్రంగా ఒదిగిపోవాలని లేదా !

ఉంటే సాధన చేసి ఆ ఒక్కడివి నువ్వే కావాలి
జనన మరణ కాలచక్రం నుండి తప్పించుకోవాలి
కష్టాలు కడగండ్లు ఈతిబాధలనుండి విముక్తి పొందాలి
పునర్జన్మలేని శాశ్వత పరమాత్మ సన్నిధిని చేరాలి

మభ్యపెట్టడానికి వ్రాసిన ఒట్టిమాటలు కావివి
పురాణాలలో శాస్త్రాలలో పెద్దల ప్రవచనాలలో
మహపురుషుల మహర్షుల బొధనలలోని
సారాంశాలు అనుభూతులలోని నగ్న సత్యాలు

- నాగులవంచ వసంత రావు