జంట కవులు

ఇంద్రియాలు మహా ప్రమాదకారులు
పడవేస్తాయి మనసును మాయాజాలంలో

శబ్ధ, స్పర్శ, రూప, రస, గంధాలతో నిత్యం
ఆనందానుభూతులను అనుభవిస్తుంది మనసు

పంచపాండవుల్లాంటి గొప్ప ఐకమత్యం
మనసును లొంగదీసుకునే పరమ లౌక్యం

ఇంద్రియాల ఒత్తిడికి మనసు చిత్తవుతుంది
అనుభవాల చిరుజల్లులతో తడిసి ముద్దవుతుంది

యవ్వనంలో మదపుటేనుగుల బలం
ఎంతకూ తనివితీరని మధురానుభవం

ఆనందాల అనుభవాల మేలి ముసుగులో
ఒళ్ళును ఇల్లును తెగ గుల్ల చేస్తాయి

పరమ గుట్టుగా సాగిపోయే జీవన నౌకను
నడి సముద్రంలో నిర్ధక్షిణ్యంగా ముంచేస్తాయి

సొమ్మొకడిది సోకొకడిదన్నట్లు
రద్దిమోసేది ఇంద్రియాలయితే

రసానుభూతి పొందేది మనస్సు
రోగాలపాలయ్యేది అమాయక శరీరం

రెండూ కంటికి కనిపించని తోడుదొంగలు
తెలివిగా పని కానిచ్చుకునే బుడుబుంగలు

కుదురుగా కూర్చున్న ఇంద్రియాలను కదిపితే
చుట్టుముడుతాయి తేనెటీగల్లా రసానుభూతులకోసం

అసలుకన్న కొసరు ముద్దన్నట్లు
అనుభవాలకన్న ఊహలలోనే అమితానందం

అందరు హాయిగా అనుభవిస్తుంటే
నాకెందుకు మడి తడియని మనసు గోల చేస్తుంది

పొందినదానికన్న పోగొట్టుకున్న దెక్కువని
అల్ప సుఖాలలోన ఆనందం లేనేలేదని

అంత్యకాలంలో అసలు విషయం తెలుసుకుని
మనసు మరీ మరీ బాధ పడుతుంది

మనసే ఒక మహమ్మరి మనిషే ఒక అహంకారి
బుద్ధి చక్కగా వికసిస్తే అవుతుంది పరోపకారి

- నాగులవంచ వసంత రావు