బలహీనతలు
మనసుకు మత్తెక్కించి ఇంద్రియాలను ఉసిగొలిపే
అశ్లీల సాహిత్యం కాదు నేడు జగతికి కావలసింది
ఇంద్రియాలను శాంతపరచి మానసిక వికాసం కలిగించే
విజ్ఞాన జనిత, భక్రిరస పూరిత ఆధ్యాత్మిక రచనలు కావాలి
అమాయకులను భయపెట్టే క్షుధ్ర రచనలు
కాసులను మూటగట్టుకునే ఆత్మవంచనలు
ద్వంద్వార్ధాల పాటలతో క్యాసెట్లు, సి.డి.లు
జుగుప్సాకర భంగిమలతో అతివల పోస్టర్లు
ఇంద్రియాలు పట్టుదప్పి రసాస్వాదనకై పరుగులు
మనసును మత్తెక్కించే మాయాజాలాలు
అర్ధనగ్న దృశ్యాలు, హావభావ అనాగరిక చేష్టలు
కళ్ళు తెరచి చూడలేని శ్రంగార భంగిమలు
ఇంద్రియాలను పట్టుతప్పించే విపరీతపు సంగీతాలు
మన సినిమాలు, టి.వి.లు బహుచక్కగా ప్రదర్షిస్తునాయి
మూఢ నమ్మకాలను ప్రోత్సహించే యంత్ర తంత్రాలు
మానవ జాతికి పట్టిన బహుకాలపు మూర్ఖత్వపు చీడలు
దేవుడు ఆవరించిండంటూ తెగ ఊగే పూనకాలు
మద్యం మత్తులో జనానికి వేసే మోసపు టోపీలు
గతాన్ని భూతంలా వర్ణించి వర్తమానాన్ని వక్రీకరించి
భవిష్యత్తు గురించి భయపెట్టే కంప్యూటర్ వగైరా
జ్యోతిష్యాలు మానవ మనుగడకు అశనిపాతాలు
ప్రపంచ ప్రగతి మార్గానికి తీరని అవరోధాలు
అదృష్టం తన చేతుల్లోనే, చేతల్లోనే గలదని తెలియక
అమాయకంగా జ్యోతిష్కునికి చేయందించే ప్రబుద్ధులు
మాటకారులకు కాసుల పంటగా మారే అక్షయ పాత్రలు
మూఢ విశ్వాసాల, బలహీనతల గూట్లో చిక్కిన చిలుకలు
ముక్తి ప్రసాదిస్తామంటూ మూటలు కోరే స్వామీజీలు
కాషాయం ముసుగులో దర్జాగా జీవించే అపర కుబేరులు
హృత్ తాప నివారణ గావించకనే విత్తాపహరణ చేసే బాబాలకు
ముక్తిని అంగడి వస్తువుగా భావించే అమాయక భక్తులే సమిధలు
- నాగులవంచ వసంత రావు
0 Comments:
Post a Comment
Subscribe to Post Comments [Atom]
<< Home