Friday, June 1, 2007

మాయ

ఎండమావి లాంటిది మాయ
ఉన్నది లేనట్లుగా లేనిది ఉన్నట్లుగా
ఊహించి. ఊరించి, ఉసిగొలిపి
తెగ తికమక పెడుతుందీ మాయ

మాయ చేతిలో మహామహులే మట్టికరిచారు
చరిత్ర హీనులుగా చివరికి మిగిలిపోయారు

బావిలోని నాచులాంటిది మాయ
వైరాగ్యమనే రాళ్ళను తరచుగా రువ్వితే
అసలు స్వరూపం అవగతమౌతుంది
అజ్ఞానాంధకారాలు అంచెలంచెలుగా
పటాపంచలై సత్యదర్శనమౌతుంది చివరికి

పిల్లిలా పొంచి వుంటుంది మాయ
మనసు ఎప్పుడు బలహీనపడుతుందా అని

ఒక్క క్షణంలో మోసంలో పడవేస్తుంది
మోహావేశంలో మత్తుగా ముంచెత్తుతుంది

అష్ఠ, శత, సహస్రావధానులైనా సరే
ఆదమరిస్తే మాయ చేతిలో పసిబిడ్డలే

సర్వసంగ పరిత్యాగులైనా, విరాగులైనా సరే
నిగ్రహం కోల్పోతే మాయకు గులాములే!

భాషా పాండిత్యాలకు లొంగనిదీ మాయ
ఎంతటి విద్వాంసులైనా మాయకు అధీనులే

ఇంద్రియాలకు లోబడి ప్రవర్తించినంత కాలం
అంతర్వాణిని పెడచెవిని పెట్టి తిరిగినంత కాలం

సాధించలేమోనని సందేహించకు సాధకుడా!

మహాత్ముల నీతిబొధల స్ఫూర్తితో
శజ్జన సాంగత్యం, సద్గ్రంథ పఠనలతో

వర్తమాన పరిస్థితులను విపులంగా విశ్లేషిస్తూ
మాయ కళ్ళకే మాయ పొరలు కమ్మించి

ఆకాశ వీధిలో సూర్య భానునిలా నిత్యం వెలిగిపో!
మాయను నిండా జయించి మహాత్ముడిగా మిగిలిపో!!


- నాగులవంచ వసంత రావు

0 Comments:

Post a Comment

Subscribe to Post Comments [Atom]

<< Home