దాన గుణం

గుడిసెలోన యున్నవాడు మేడ కొరకు తపియించె
మేడలొ నివసించువాడు పది మేడలను కాంక్షించె

సైకిలున్నవాడేమొ బైకు కొరకు దేబిరించె
బైకు గలిగిన వాడు కారు కొరకు కలవరించె

వేల సంపదలున్నవాడు లక్షల కొరకు ప్రయత్నించె
లక్షలు గూడిన పిదప కోట్ల కొరకు పరుగులెత్తె

ఆశయంటె యిదేనేమొ అవనిలోన పరికింప
ఆశ ఉండవచ్చుగాని అత్యాశ నీకు తగదెప్పుడు

ఆశపాశ బద్ధుడవై అనుక్షణం తపియించి
సాలెపురుగు వోలె అత్యాశలోన జిక్కినావు

ఇంకొచెం ధనముంటె దానాలెన్నొ జేసెవాడినని
అంతరాత్మ హితోక్తిని అతి తెలివిగ ఆణచివేసి

జీవిత కాలమంత ధనకాంక్షలొ జిక్కినావు
కోట్లకు పడగెత్తినా కోర్కెలెన్నొ బెంచినావు

కలిగిన దానిలొ దానం ఈరోజు చెయ్యనోడు
రేపు కలిసొస్తే చేస్తాడనేది కల్లయని తెలుసుకో

ఉన్నంతలోనె సదా ఉదారంగ దానం చేసి
మానవ జన్మ సార్ధకతను మహిలోన చాటాలోయి

మృత్యువెపుడు కబళించునొ మనకసలే తెలియదోయి
కనురెప్ప పాటులోన జీవితమ్ము అంతరించు

నీవు కన్న కలలన్నీ కల్లలుగా మారునోయి
శ్వాస ఆడినపుడె విరివిగ దానంబు జేయవోయి

గుప్తదాన మొనరించి గట్టి ఫలము నొందవోయి
దానకర్ణుడు యనెటి బిరుదాన్ని బొందవోయి!

- నాగులవంచ వసంత రావు