అపసవ్య పోకడలు

సభ్య సమాజపు అపసవ్య పోకడలు
గుండె లోతుల్లో గునపాలై గుచ్చుకుంటే
లావాలా పొంగుకొస్తుంది బాధామయ కవిత్వం
అపసవ్యాన్ని సవరించుకుంటేనే ఉంటుంది భవితవ్యం

శృతిమించిన శృంగారపు చేస్టలు
తామే అన్యోన్యులమన్న హావ భావాలు
అన్నీ నడిరోడ్డు పైనే విచ్చలవిడిగా
హైటెక్కు రోడ్డు మీదే నింగీ నేలా సాక్షిగా

ఎదుటివాడు బాగుపడితే కుళ్ళు
తన విజయానికేమో జలదరించును ఒళ్ళు
ప్రగతి మార్గానికివి వేస్తాయి సంకెళ్ళు
నీచ సంస్కారానికివి చక్కని నకళ్ళు

మూర్ఖుని చిత్తం ఉంగరాల జుట్టు
ఎంత ప్రయత్నించినా మారదు ఒట్టు
మారినట్లుగా చేస్తాడు కనికట్టు
మారాడని నమ్మావా నీపని ఫట్టు

పెంచాలి అనంతంగా హృదయాన్ని
దించాలి సమూలంగా అహంకారాన్ని
త్రుంచాలి క్షుధ్ర మమకారాన్ని
పంచాలి విశ్వవ్యాప్త ప్రేమ తత్వాన్ని
- నాగులవంచ వసంత రావు